08 ივლისს მთავრობის ადმინისტრაციის ბრიფინგზე პრემიერ-მინისტრის მრჩეველმა ირაკლი ჩიქოვანმა განაცხადა, რომ საქართველო ევროკავშირის წევრ 5 ქვეყანას უპირობოდ უხსნის საზღვარს, ეს ქვეყნებია:
• გერმანია;
• საფრანგეთი;
• ლატვია;
• ლიეტუვა;
• ესტონეთი.
უპირობო გახსნა გულისხმობს იმას, რომ ამ ქვეყნების მოქალაქეებს შეეძლებათ ყველა სახის ვიზიტი საქართველოში, პირდაპირი საჰაერო ავიამიმოსვლის გზით. თითოეულმა მგზავრმა უნდა შეავსოს სპეციალური ანკეტა და უნდა წარმოადგინოს ინფორმაცია ბოლო 14 დღის განმავლობაში მოგზაურობის შესახებ. თუკი აეროპორტში მათ თერმოსკრინინგის შედეგად დაუფქსირდათ 37 გრადუსზე მეტი ტემპერატურა, მათ ჩაუტარდებათ PCR ტესტი.
რაც შეეხება იმ ქვეყნების მოქალაქეებს, რომლებმაც საქართველო შეიყვანეს ე.წ. მწვანე სიაში და დაუწესეს სხვადასხვა სახის შეზღუდვები, მათ შეეძლებათ საქართველოში შემოსვლა 14-დღიანი კარანტინის პირობით. ამასთან, აღნიშნული პირები კარანტინის ხარჯებს თავად გაიღებენ.
კონკრეტული შეზღუდვების დაწესებით საზღვრების გახსნის მზაობა გამოთქვეს შემდეგმა ქვეყნებმა: იტალია, კვიპროსი, ისლანდია და სლოვენია, შესაბამისად, ამ ქვეყანაში ჩასულმა პირებმა უნდა გაიარონ 14 დღიანი სავალდებულო კარანტინი.
ამ ეტაპზე საქართველოსთვის საზღვრებს არ ხსნიან შემდეგი ქვეყნები: ავსტრია, ბელგია, ბულგარეთი, დანია, ნორვეგია, მალტა, შვეიცარია ჩეხეთი, სლოვაკეთი და უნგრეთი.
ამასთან, საქართველოში ეკონომიკური საქმიანობის ხელშეწყობის მიზნით საქმიანი ვიზიტები ყველა ქვეყნიდან შეუფერხებლად განხორციელდება წინასწარ შესაბამისი ფორმის შევსების და შესაბამის დარგობრივ უწყებასთან შეთანხმების გზით.
საქმიანი ვიზიტით საქართველოში ჩამოსულ სტუმრებს ეკისრებათ ვალდებულება, ყოველ 72 საათში ერთხელ, საკუთარი სახსრებით ჩაიტარონ Covid19-ზე PCR ტესტი, ან გაიარონ სავალდებულო 14-დღიანი კარანტინი, ასევე საკუთარი სახსრებით. აღნიშნული, ბუნებრივია, არ ეხებათ ევროკავშირის წევრი იმ 5 ქვეყნის მოქალაქეებს/რეზიდენტებს, რომლებთანაც საქართველო უპირობოდ ხსნის საზღვრებს.
რაც შეეხება საქართველოს მოქალაქეებს, მათ ევროკავშირში ნებისმიერი მიზნით ვიზიტის შემდგომ სამშობლოში დაბრუნებისას უნდა გაიარონ 14-დღიან კარანტინი.
შესაბამისი ელექტრონული ფორმები, რომლის შევსებაც წინასწარ მოუწევთ როგორც ევროკავშირის ზემოთჩამოთვლილი ქვეყნების მოქალაქეებს, ასევე, ნებისმიერი საქმიანი ვიზიტის განმახორციელებელ პირებს, ხელმისაწვდომი იქნება საქართველოს მთავრობის მიერ სპეციალურად შექმნილ ვებგვერდზე www.StopCov.ge.
